مقالات ساخرة في السياسة .. مسرح الأطفال يقدم مسرحية: البطة والماما إنتي ياكتكوته بطه؟! لأ أنا أسد بس مبطبط - المهندس/ هشام النجار

أعزائي القراء

كشف  صندوق مراسلات بشار الأسد عن كيفية إدارة الحكم في سوريا..من هذا الواقع المأساوي الذي إطّلع عليه العالم كله,إستوحيت فكرة هذه المحاوره الساخره على الموبايل بين بشار الأسد الذي مُنِح وسام الشرف من  فئة بطه من قبل مستشاريه السياسيين وبين والدته..فإلى الحوار

الماما: صباح الخير حبيبي بشبش ..صار لي جمعه ماشفتك ..وين غيطط يا ملعون؟. إمبارح خبرتّني أختك بشرى, قالتلي شافوك عتلفزيون الدنيا في مطعم ديك الجن في حمص..ولاك صحيح هالخبر؟ موعيب عليك يا إبني مابتؤلّي ولابتؤول لبشرى ولا لخالتك ولا إبن خالتك ولاعمتك؟ تفو عليك ..انا ماربيتك هيك, ولاك إبني في إصول,,في إصول ,,والله كل بيت الأسد وبيت مخلوف وبيت شاليش على لَمْ الفراش زعلانين مِنَّك وعاتبين عليك وعبؤولوا صرت لعبه بإيد بنت الأخرس..ولاك إبني  هلأ (هلق) صارت بنت الأخرس الكل بالكل. وشاليش ومخلوف ورا الكل؟ ياحيف عالتعب.

البطه: أعوذ بالله شو هالحكي ياماما..كل الحكايه طلبوني أهل حمص منشان يشكروني على تحديث مدينتون, وبعد ما إعتمدنا المخططات حلفوا علي يمين إلا نتغدى سوى , شالو السياره وحملوني على ديك الجن ,ياريتك تسمعي هتافاتون ما خلّو هتاف ياماما إلا رموه بوجّي..بالمناسبه ياست الكل أرخص عرض إجانا منشان تخريب  حمص كان أربع مليار دولار مقّدم من شركه إيرانيه روسيه مشتركه إسمها: شركة الإمام الغايب لإعادة تعمير بيوت الحبايب,بس بشطارتي خربتا بـ خمسمية مليون دولار بس.

الماما: ولاك يؤبرني شاطر طالع لأبوك.المهم تكون إنبسطت في ديك الجن...بس والله إشتهيت أختك بشرى تكون معك ..صحيح إبني بشرى زعلانه منَّك.

البطه: خير إن شا الله , والله مستعد أزعّل الشعب كلّو ولا أزعلّ بشرى.

الماما : هيك يابشبش بتحط تحت إيدك الشرشوحه إللّي مابتتسمى هديل,, والتانيه مأصوفة الرأبه شهر زاد ,وبتنسى أختك بشرى!, مو عيب ولاك إبني, أختك بشرى ياما فَكت لّك حفوضاتك وأنت زغير, وياما شخيت عليها كأنو ما ورد وحلو على ألبا, أختك بشرى فهمانه ونصائحها مليانه, وبعدين ما منّا نزعلّ جوزا ..إنت بتعرف مابدو حدا يؤلّك ولاك إبني.

البطه:  طيب تكرمي ماما بكره راح أصدر مرسوم جمهوري اعين بشرى مستشاره في القصر الجمهوري سعرا بسعر بنت الشعبان..إش بدك أكتر من هيك , بس ما تزعلي.

الماما: ولاك تؤبرني شو مرضي

 الماما: بشبوش ..ليش هالشهر بعتّلي حصتي ١٥٠ مليون دولار بس؟
مو إتفقنا حصتي ١٠ ملايين  دولار من شركة موبايل غروب..و٧٠ مليون من شركتنا إلّلي إسما : شوي .. شوي ومركزا  دبي. و٧٠ مليون تانيه من شركتنا إلّلي إسما: شارموت ومركزا بيروت. و٥٠ مليون دولار خرجيتي منَّك ومن إخوتك ...يالله لَعّب إيدك.. أوام..أوام عل الخمسين مليون (تضحك على الهاتف)  ممكن حدا بيؤًتُل شعبو..بس مو ممكن حدا يسرؤ أمّو هدا إسمو حرام إبني..مابجوز من الله.

    البطه: والله ياماما الشغل وائف متل مابتعرفي , بس يتحرك السوق عن أريب وأبني حمص وحماة وإدلب ودرعا والشام وحلب واللادقيه وجبله وبانياس والرقه ودير الزور والحسكه وأحولّها لمنتجعات سياحيه بياخدوا العأل هداك الوأت خدي بدال الخمسين ميه.

الماما: روح إن شا الله تمسك تراب حمص يؤلِب دهب.

سماع إبني يوم الجمعه العشا عندي جيب أخوك الزغير ماهر معك منشان مايزعل. بدي أطبخلك صياديه تاكول أصابيعك وراها..بس يا أبني لاتجيب معك بنت الأخرس بتبأ غريبه, واحد بحكي كلمه بلؤش لأشه..بتروح بتحكي لأبوّا..إبني ما منّا جواسيس بيناتنا.

 البطه:  والله ياماما أسما مجربه وأصيله...خربتلاّ حمص حاره..حاره ..وزنقه..زنقه ولادمعه وحده نزلت من عينا. بس متل مابتريدي ياماما...يالله بدك شي ياست الكل عندي إجتماع مع ماهر وجماعتو.

الماما: سلامتك بس إلّو لماهر يدير بالو على حالو لأنو ألبو كتير طيب.
أعزائي القراء
وتغلق الستاره على هذه المأساة  فلقد حان الوقت لإجتثاث هذا النظام من جذوره وإنزال الستاره المختبئ وراءها  الأسد إلى الأبد.

مع تحياتي 

المهندس هشام نجار
 المنسق العام لحقوق الإنسان - الولايات المتحده
عضو في المجلس الإقليمي لمناهضة العنف والإرهاب وتعزيز الحرية وحقوق الإنسان